• October 22, 2023

इजरायल घटनामा ज्यान गुमाएका ४ जनाको शव परिवारलाई बुझाइयो

काठमाण्डौ । इजरायलमा प्यालेस्टिनी विद्रोही समूह हमासको आक्रमणमा परि ज्यान गुमाएका सुदूरपश्चिम प्रदेशका चारजना युवाको शव धनगढी विमानस्थलमा आज (आइतबार) मृतकका परिवारलाई बुझाइएको छ ।

कैलालीको जोशीपुर गाउँपालिका आशिष चौधरी, घोडाघोडी नगरपालिकाका नरायणप्रसाद न्यौपाने, दार्चुला मालिकार्जुन गाउँपालिकाका लोकेन्द्रसिंह धामी र दार्चुला घर भई कञ्चनपुर निबुवाखेडाका दीपेशराज विष्टको शव परिवालाई बुझाइएको हो । मृतक चार युवा विद्यार्थीको शव नेपाली सेनाको स्काई ट्रकमार्फत धनगढी विमानस्थलमा पु¥याइएको थियो । शव बुझ्न मृतकका परिवार धनगढी विमानस्थलमा पुगेका थिए ।

विमानस्थल पुगेका सुदूरपश्चिम प्रदेशका उद्योग पर्यटन वन तथा वातावरणमन्त्री रमेशसिंह धामी, प्रदेशसभाका नेपाली कांग्रेसका प्रमुख सचेतक विक्रमसिंह धामी, मृतक विद्यार्थीले अध्ययन गरेका सुदूरपश्चिम विश्वविद्यालयअन्तर्गत स्कुल अफ एग्रिकल्चर, कृषि विज्ञान सङ्काय टीकापुरका प्राध्यापक सुशील न्यौपाने, परिवारलगायतले मृतकप्रति श्रद्धाञ्जली अर्पण गर्नुभयो ।

मृतकका आफन्तलाई शव बुझाउन कैलालीका प्रमुख जिल्ला अधिकारी युवराज कट्टेल, जिल्ला प्रहरी प्रमुखलगायत विमानस्थल पुग्नुभएको थियो ।

स्कुल अफ एग्रिकल्चर, कृषि विज्ञान सङ्काय टीकापुरका प्राध्यापक सुशील न्यौपानेका अनुसार ‘लर्न एन्ड अर्न’ कार्यक्रमका लागि ४९ युवा विद्यार्थी इजरायल गएकामा १७ जना हमास आक्रमणमा परेका थिए । यीमध्ये १० जनाको ज्यान गएको थियो । मृतकमध्ये सात जना सुदूरपश्चिम प्रदेशका रहेकोमा तीनजनाको शव पुग्न बाँकी छ ।

कञ्चनपुर महेन्द्रनगरका बिपिन जोशी अझै सम्पर्कविहीन रहेका छन् । घटनामा घाइते भएका तीन जना उपचाररत रहेका छन् भने ३५ जना नेपाल फिर्ता भइसकेका छन् ।

मृतकको शव लिएर धनगढी विमानस्थल पुग्नुभएका नेपालका लागि इजरायली राजदूत खनान गुडेरले मृतक परिवारका आफन्तसँग भेट गरी घटनाबाट आफू दुःखित रहेको बताउनुभयो । धनगढी विमानस्थलको विशिष्ट कक्षमा राजदूत गुडेरले मृतकका परिवारजनसँग दुःख साट्नका लागि आफू धनगढी पुगेको भन्दै समवेदना व्यक्त गर्नुभयो ।