• October 8, 2023

एमाले उपत्यका विशेष प्रदेश कमिटी अध्यक्षमा प्रेम पराजुली सर्वसम्मत

काठमाण्डौ ।  नेकपा एमाले उपत्यका विशेष प्रदेश कमिटीको सबै पदमा सर्वसम्मत नेतृत्व चयन भएको छ । प्रथम अधिवेशनबाट प्रेम पराजुलीको अध्यक्षतामा सबै पदमा सर्वसम्मत भएको हो ।

निर्वाचन समितिका संयोजक घनेन्द्र श्रेष्ठले सबै पदमा दोहोरो उम्मेदवारी नपरेको जानकारी दिनुभएको छ । अध्यक्षमा उम्मेदवारी दिएका नेपाल पर्यटन बोर्डका उपाध्यक्ष समेत रहेका चन्द्र रिजालले छाडिदिएपछि सबै पदमा सर्वसम्मत नेतृत्व चयन भएको हो । अधिवेशनबाट उपाध्यक्षमा जिफन्टका उपाध्यक्ष विदुर कार्की निर्विरोध हुनुभएको छ । त्यस्तै सचिवमा मिलेन धरेल निर्विरोध हुनुभएको छ । त्यस्तै उपसचिवमा जिफन्टकै उपाध्यक्ष जितेन्द्र श्रेष्ठ र उर्मिला सुनुवार निर्विरोध निर्वाचित हुनु भएको छ ।

गैह्रभौगोलिक र बुद्धीजीवी–कर्मचारी क्षेत्रका सदस्य आबद्ध यस प्रदेश कमिटीको सदस्यहरू पनि सबै निर्विरोध निर्वाचित भएका छन । कुल तीन सय चार प्रतिनिधि रहेको अधिवेशनले ७५ सदस्यीय नयाँ नेतृत्व चयन गरेको हो । यस प्रदेश कमिटी मातहत बुद्धिजीवी विशेष, मजदुर, विद्यार्थी र उद्योग–व्यावसय गरी चार जिल्ला कमिटी र ५८ इलाका कमिटी रहेका छन ।