• July 29, 2024

मुद्दा चलेको दुई दशकपछि पूर्वमन्त्री गोविन्दराज सर्वोच्च अदालत बाट पनि दोषी ठहर

काठमाण्डौ। मुद्दा चलेको दुई दशकपछि पूर्वमन्त्री गोविन्दराज जोशी भ्रष्टाचार मुद्दामा अन्तिम अदालतबाट पनि दोषी ठहर हुनुभएको छ ।

सर्वोच्चमै झन्डै १२ वर्षदेखि विचाराधीन मुद्दामा अदालतले हिजो अन्तिम फैसला सुनाएको हो । सर्वोच्च अदालतले जेठ २० गते मुद्दाको बहस सकेर निर्णय सुनाउने मिति तोकेको थियो । १९ बर्ष अघि विशेष अदालतमा मुद्दा दर्ता भएको थियो । विशेष अदालतले जोशीलाई डेढ वर्ष कैद र दुई करोड १६ लाख १४ हजार ३७६ रुपियाँ जरिबाना फैसला गरेको थियो । सर्वोच्चले भने विशेष अदालतले तोकेको कैद र जरिबाना दुवै घटाइदिएको छ । सर्वोच्चका सहायक प्रवक्ता गोविन्दप्रसाद घिमिरेका अनुसार जोशीलाई नौ महिना कैद र ६९ लाख १६ हजार रुपियाँ जरिबाना भएको छ ।
विशेष अदालतको फैसलामा चित्त नबुझे पछि जोशीले २०६९ फागुन ६ गते सर्वोच्चमा पुनरावेदन दर्ता गर्नुभएको थियो । सार्वजनिक पदबाट बाहिर रहिसकेको अवस्थामा आफूलाई भ्रष्टाचार निवारण ऐन नलाग्ने जिकिरसहित जोशीले पुनरावेदन दर्ता गर्नुभएको थियो ।