• September 23, 2023

सरकार शैक्षिक क्षेत्रको लगानी बढाउन तयार छैन : योगेशकुमार भट्टराई

काठमाण्डौ । प्रमुख प्रतिपक्ष दल नेकपा (एमाले) का सचिव एवं पूर्वमन्त्री योगेशकुमार भट्टराईले सरकार मुलुकको शैक्षिक क्षेत्रको विकासमा संवेदनशील नभएको बताउनुभएको छ ।

मुलुकको समग्र आर्थिक समृद्धि र विकासको पहिलो जग शिक्षा भएपनि सरकार त्यस क्षेत्रको विकासका लागि लगानी बढाउन तयार नभएको उहाँको भनाई थियो ।

शिक्षाका लागि राष्ट्रिय अभियान नेपालले आज (शनिबार) काठमाडौंमा आयोजना गरेको एक कार्यक्रममा बोल्दै सचिव भट्टराईले मुलुकलाई सवल राष्ट्रमा परिणत गर्न पनि सरकारले शिक्षामा लगानी बढाउनुपर्ने आवश्यक्ता औंल्याउनुभयो ।

सचिव भट्टराईले गुणस्तरीय शिक्षाका लागि राष्ट्रिय बहसको सुभारम्भ गर्न पनि सरकारलाई सचेत गराउनुभयो । उहाँले शिक्षामा लगानी गर्ने कुरा वार्षिकरुपमा घट्दै जानु बिडम्बनाको विषय भएको समेत स्पष्ट पार्नुभयो ।

लगानीको कमी भएकाले शिक्षामा सोचे अनुसारको प्रतिफल प्राप्त हुन नसकेकोतर्फ पनि सचिव भट्टराईले सरकारको ध्यानाकर्षण गराउनुभयो । उहाँले गुणस्तरीय शिक्षाका लागि सरकारले अभिभावकहरुको संलग्नतामा पनि जोड दिनुपर्ने बताउनुभयो ।