आज गणेश चतुर्थी र ऋषिपञ्चमी पर्व मनाइँदै
काठमाण्डौ । आज गणेश चतुर्थी र ऋषिपञ्चमी पर्व मनाइँदैछ ।
विशेषगरी ऋषि पञ्चमी पर्व, सप्त ऋषिको पूजाआराधना गरी मनाउने गरिन्छ । महिलाहरुले आज बिहानै उठेर नजिकको नदी, खोला, ताल, तलैया र पोखरीमा गई स्नान गर्ने चलन छ ।
स्नान गरेपछि अरुन्धतीसहित अत्रि, गौतम, भारद्वाज, जमदग्नि, वशिष्ठ, कश्यप र विश्वामित्रको पूजा गर्ने गरिन्छ । जसलाई ऋषि पञ्चमीको पूजा लगाउने भनिन्छ । सप्तऋषिको पूजा गर्ने भएकैले आजको पञ्चमीलाई ‘ऋषि पञ्चमी’ भन्ने गरिएको हो ।
आज काठमाण्डौको टेकु, मूलपानीलगायत देशभरका ऋषेश्वर मन्दिरमा पूजाआजाका लागि श्रद्धालु महिला भक्तजनको घुइँचो लागेको छ । यस वर्ष गणेश चतुर्थी र ऋषिपञ्चमी पर्व एकै दिन परेको नेपाल पञ्चाङ्ग निर्णायक समितिले स्वीकृति दिएका पात्रोमा उल्लेख छ ।
अस्ति आइतबार दर खाई तीज पर्व शुरु भएकोमा हिजो भदौ शुक्ल तृतीयामा व्रत बसी पूजा, उपासना गरिएको छ । गएको भदौ १० गते रसुवाको भोटेकोशी बाढीको पीडाका कारण विगतका वर्षमा जस्तो यसवर्ष तीज पर्वको रौनक रहेन ।
आज सप्तऋषिको पूजासँगै तीज समापन हुन्छ ।
Recent News
-
September 15, 2026आज गणेश चतुर्थी र ऋषिपञ्चमी पर्व मनाइँदै
-
September 15, 2026देशका पहाडी भागका केही ठाउँमा मेघगर्जन/चट्याङ्गसहित मध्यमसम्मको वर्षा
-
September 15, 2026भारतले नेपाललाई दैनिक ६५४ मेगावाट बिजुली दिने
-
September 14, 2026ओमानले होर्मुज वार्ता स्थगित गरेपछि तेलको मूल्य १०७ डलर नाघ्यो
-
September 14, 2026आज हरितालिका तीज पर्व मनाइँदै
-
September 13, 2026भोटेकोशी बाढी हिमपहिरोका कारण आएको तथ्यसहित सरकारी प्रतिवेदन सार्वजनिक