• February 21, 2025

आरजेडएम ब्रान्डका १५ र १६ सिटे विद्युतीय गाडी नेपाल भित्रिए

काठमण्डौ । नेपाली बजारमा चीनको प्रसिद्ध कम्पनी शाङच आरजेडएम अटोद्वारा उत्पादित आरजेडएम ब्रान्डका १५ र १६ वटा सिट भएका विद्युतीय गाडी भित्रिएका छन् । नेसनल मोटर्स र राठी ट्रेडिङले संयुक्त रूपमा आरजेडएम ब्रान्डका यी विद्युतीय गाडी नेपाल भित्र्याएका हुन् । काठमाण्डौमा आयोजित एक कार्यक्रममा नेसनल मोटर्सका प्रबन्ध निर्देशक सञ्जय कुमार अग्रवाल, राठी ट्रेडिङका प्रबन्ध निर्देशक दिनेशकुमार राठी र शाङच आरजेडएम अटोका अन्तर्राष्ट्रिय महाप्रबन्धक केन सुनले सहकार्यको घोषणा गर्नुभयो ।

कार्यक्रममा आरजेएम अटो नेपालका सीईओ मनोज खतिवडाले आरजेडएम ब्रान्ड नेपाल भित्र्याउनुका कारण र गाडीका विशेषताबारे चर्चा गर्नुभएको थियो । नेसनल मोटर्सका एक्जिक्युटिभ डाइरेक्टर मनोज विक्रम शाहले नेसनल मोटर्स र एसएमएल इसुजुको इतिहास तथा अहिलेको अवस्थाबारे बोल्दै नयाँ आरजेडएम ब्रान्ड थप गरिएकोबारे चर्चा गर्नुभयो । कार्यक्रममा नयाँ ग्राहकलाई गाडीको साँचो समेत हस्तान्तरण गरिएको थियो । ई–फाइभ सिरिजको १५ सिटे विद्युतीय गाडीमा ५३ दमलव ५८ किलोवाट आवरको सीएटीएलको थर्ड जेनेरेसन ब्याट्री प्रयोग गरिएको छ जसले सिङ्गल चार्जमा जस्तोसुकै सडकमा पनि औसतमा दुई सय ५० किलोमिटरको रेन्ज दिने प्रमाणित भएको छ । समतल सडकमा भने यसले तीन सय किलोमिटरभन्दा बढी रेन्ज दिएको पाइन्छ । डब्ल्यूएलटीपी अनुसार यसको रेन्ज तीन सय किलोमिटर छ । यसको ग्राउन्ड क्लियरेन्स दुई सय एमएम छ । यसको पिकपावर एक सय किलोवाट र रेटेड पावर ५० किलोवाट छ भने तीन सय एनएमको टर्क छ ।

त्यसैगरी १६ सिटे आर–फाइभ मोडलमा अझै फराकिलो बडीसहितको संरचना छ । यसमा ७७ दशमलव २८ किलोवाट आवरको सीएटीएलको थर्ड जेनेरेसन ब्याट्री प्रयोग गरिएको छ जसले सिङ्गल चार्जमा तीन सय ६६ किलोमिटर ९डब्ल्यूएलटीपी० रेन्ज दिने कम्पनीले दाबी गरेको छ । यसमा एक सय २० किलोवाटको पिकपावर दिने मोटर भएकाले उकालो र ओरालोमा सहजताका साथ जान्छ । यसको रेटेड पावर ६० किलोवाट छ भने टर्क तीन सय ५० एनएम छ ।

नयाँ प्रविधिअनुसार ६० किलोवाटको चार्जर प्रयोग गरी यी गाडीलाई ४५ मिनेटमै चार्ज गर्न सकिन्छ । काठमाण्डौबाट पोखरासम्म गरिएको परीक्षणमा यसले पूरा चार्ज गर्दा ५१ प्रतिशत चार्ज बाँकी भएकै अवस्थामा पोखरा पुगेको कम्पनीले बताएको छ । एक सय ८० एमएमभन्दा धेरै ग्राउन्ड क्लियरेन्स सहितका विशेषता भएको यो विद्युतीय गाडी आरामदायी समेत भएकाले लामो यात्राका लागि उपयोगी रहको कम्पनीले जनाएको छ । ई–फाइभको बजार मूल्य ५४ लाख २५ हजार रुपैयाँ र आर–फाइभको बजार मूल्य ७३ लाख ५० हजार रुपैयाँ तोकिएको छ ।