• January 31, 2025

सुनिल भलिबल क्लबलाई हराउँदै गण्डकी दोस्रो क्वालिफायरमा

काठमाण्डौ । गण्डकी प्रदेश भारतको सुनिल भलिबल क्लबलाई हराउँदै टाइगर कप भलिबलमा पुरुष तर्फको दोस्रो क्वालिफायरमा पुगेको छ ।

पोखरा रंगशाला स्थित भलिबल कोर्टमा आज शुक्रबार भएको खेलमा भारतीय क्लबलाई ३–१ को सेटमा पराजित गर्दै गण्डकी दोस्रो क्वालिफायरमा पुगेको हो ।

पहिलो सेट ३१–३३ ले गुमाएको गण्डकीले त्यसपछि ३ सेटमा पुनरागमन गर्दै खेल जितेको हो । दोस्रो सेट २५–१७, तेस्रो सेट २५–१६ र चौथो सेट २५–१७ ले आफ्नो पक्षमा पारेर गण्डकीले खेल जितेको हो ।

दोस्रो क्वालिफायरमा गण्डकीले आर्मी क्लबसँग खेल्नेछ । आर्मी क्लब पहिलो क्वालिफायरमा पुलिससँग पराजित भएको थियो ।

दोस्रो क्वालिफायरको विजेताले फाइनलमा विभागीय टोली पुलिससँग खेल्नेछ । आजै भएको पहिलो क्वालिफायरमा आर्मीलाई ३–२ ले पराजित गर्दै पुलिस फाइनलमा पुगेको थियो ।

दिनको पहिलो खेलमा आयोजक टाइगर ग्रुपलाई पराजित गर्दै एपिएफ महिलातर्फ फाइलनमा प्रवेश गरेको थियो । पराजित भएको आयोजक टाइगर ग्रुपले शनिबार फाइलन प्रवेशका लागि टिपटक न्यू डायमण्ड स्पोर्टस क्लबसँग प्रतिस्पर्धा गर्नेछ ।