• March 10, 2026

मध्यपूर्वका ५७ हजारभन्दा धेरै नेपालीले अनलाइन विवरण दर्ता गराए

काठमाण्डाै – मध्यपूर्वमा विकसित घटनाक्रमपछि सरकारले सञ्चालन गरेको अनलाइन दर्ता प्रणालीमा ५७ हजार एक सय जना नेपालीले आफ्नो विवरण दर्ता गराएका छन् ।

नेपालीहरूको अद्यावधिक विवरण सङ्कलनका लागि कन्सुलर सेवा विभागले सञ्चालनमा ल्याएको अनलाइन दर्ता प्रणालीमा हिजो बेलुकीसम्म यो सङ्ख्यामा नेपालीले आफ्नो विवरण दर्ता गरिसकेका छन् ।

मन्त्रालयले प्राप्त विवरणहरू अध्ययन गरी आवश्यकताअनुसार थप कदम चालिने जनाएको छ । परराष्ट्र मन्त्रालयले त्यहाँ रहेका नेपाली नागरिकहरूको सुरक्षा, हित तथा कल्याण सुनिश्चित गर्न आवश्यक समन्वय र पहल जारी राखेको जनाएको छ । अति आवश्यक परेका कारण साउदी अरब हुँदै नेपाल फर्कन चाहने नेपालीहरूले आफ्नो राहदानीको फोटोकपी, भिसाको फोटोकपी तथा ट्राभल योजनासहितको विवरण आफू रहेको देशका नेपाली नियोगमा पठाई भिसा सहजीकरणका लागि अनुरोध गर्न सक्ने मन्त्रालयले जनाएको छ ।

कुनै समस्या आइपरेमा मन्त्रालयको इमर्जेन्सी कन्ट्रोल रूमका टेलिफोन नम्बर वा इमेल तथा सम्बन्धित देशका नेपाली नियोगहरूले उपलब्ध गराएका सम्पर्क माध्यममार्फत तत्काल सम्पर्क गर्न मन्त्रालयले अनुरोध गरेको छ ।

मध्यपूर्वमा चलिरहेको युद्धका कारण नेपालको अर्थतन्त्रमा समेत असर पर्ने चिन्ता बढ्न थालेको छ । रेमिट्यान्समध्येको झन्डै ४० प्रतिशत हिस्सा मध्यपूर्व क्षेत्रबाट आउने गर्छ ।

राष्ट्र बैंकका अनुसार गएको पुसमा १० खर्ब ६२ अर्ब ९३ करोड रुपैयाँ रेमिट्यान्स नेपाल भित्रिएको छ । तर युद्धका कारण अबका दिनमा रेमिट्यान्स आप्रवाह प्रभावित हुन सक्ने अवस्था छ । त्यस क्षेत्रमा रोजगारीमा रहेका नेपाली श्रमिकहरू पनि जोखिममा पर्ने चिन्ता छ ।

संयुक्त अरब इमिरेट्स (यूएई), साउदी अरब, कतार, कुवेत, बहराइन, इराक, ओमान, साइप्रसलगायतका देशहरूमा ठूलो सङ्ख्यामा नेपाली श्रमिक कार्यरत छन् । युद्धले त्यहाँ रहेका झन्डै १८ लाख नेपाली श्रमिकको सुरक्षा चिन्ता थपिएको छ ।