• February 11, 2025

बाग्लुङमा सेवाग्राही विदेशिएपछि १५ हजार परिचयपत्र थन्कियो

बाग्लुङ । सेवाग्राही परिचयपत्र लिन नआएपछि जिल्ला प्रशासन कार्यालय बाग्लुङमा १५ हजार ८ सय ३८ राष्ट्रिय परिचयपत्र थन्किएका छन् ।

राष्ट्रिय परिचयपत्रको फारम भरेर धेरैजसो व्यक्ति विदेशिएका कारण परिचयपत्र लिन नआएका कार्यालयका प्रशासन शाखा प्रमुख रामप्रसाद उपाध्यायले जानकारी दिनुभयो । उहाँले नयाँ परिचयपत्रका लागि दैनिक दुई सय जनासम्म सेवाग्राही आउने भए पनि तयारी अवस्थामा रहेका परिचयपत्र लिन भने न्यून मात्र आउने गरेको बताउनुभयो ।

जिल्ला प्रशासनमा अहिलेसम्म २८ हजार ८ सय ८५ राष्ट्रिय परिचयपत्र तयार भएर आइसकेका छन् । शाखा अधिकृत उपाध्यायका अनुसार तीमध्ये जम्मा १३ हजार ४७ परिचयपत्र मात्र सेवाग्राहीले लगेका छन् भने १५ हजारभन्दा धेरै परिचयपत्र प्रशासनमै रहेका छन् ।

परिचयपत्र लिनका लागि स्वयम् व्यक्ति नै आउनुपर्ने र पुनः बायोमेट्रिक गर्नुपर्ने भएकाले परिचयपत्र वितरणको सङ्ख्या न्यून भएको हो ।

राष्ट्रिय परिचयपत्रविरुद्धको रिट सर्वोच्च अदालतले खारेजी गरेपछि सरकारले तोकेका हरेक कामका लागि अब राष्ट्रिय परिचयपत्र अनिवार्य भएको छ । चिपसहितको एउटै डिजिटल कार्डमा नागरिकका सबैखाले विवरण समावेश गरिने भएकाले नागरिकता, चालक अनुमतिपत्र ९लाइसेन्स०, फोटोसहितको मतदाता परिचयपत्र र जग्गाधनी पुर्जाजस्ता सामग्री बोकेर हिँड्ने झन्झट हुँदैन ।

राष्ट्रिय परिचयपत्रमा व्यक्तिको जन्मदेखि मृत्युसम्म दर्ता हुने व्यक्तिगत घटनाको विवरण पनि समावेश हुन्छ ।