• January 19, 2025

अमेरिकामा टिकटक बन्द

अमेरिकामा प्रतिबन्ध लागू हुनु केही घण्टा अघिदेखि नै टिकटक चल्न छोडेको छ । टिकटक प्रतिबन्ध लगाउने कानुन कार्यान्वयनमा आउनुअघि नै नचल्ने अर्थात् ‘अफलाइन’ भएको हो ।

अमेरिकी प्रयोगकर्तालाई टिकटक प्रतिबन्ध लगाउने कानुन घोषणा भएको भन्दै अहिलेका लागि टिकटक प्रयोग गर्न सक्नुहुन्न भन्ने सन्देश दिइएको छ । प्रयोगकर्ताले गुगलको एप स्टोरमा टिकटक देखा नपरेको र टिकटक डटकममा भिडिओ पनि देखा नपरेको जनाएका छन् । यसअघि सञ्जालले अमेरिकी सरकारले उपयुक्त हस्तक्षेप नगरे आजदेखि अमेरिकामा आफ्नो सेवा नचल्ने बनाउन बाध्य हुने बताएको थियो ।

अमेरिकी सर्वोच्च अदालतले चिनियाँ भिडिओ शेअरिङ एपको माऊ कम्पनी बाइटड्यान्सलाई अमेरिकामा चल्ने टिकटक आइतवारसम्म अमेरिकी कम्पनीलाई बिक्री गर्न वा प्रतिबन्धको सामना गर्न बनाइएको कानुनलाई मान्यता दिएको थियो । ह्वाइट हाउसले कानुन लागू गर्ने विषय नवनिर्वाचित राष्ट्रपतिमा निर्भर गर्ने बताएको बीबीसीले जनाएको छ ।

अमेरिकी वर्तमान राष्ट्रपति जो बाइडेनको कार्यकाल भोलि सकिँदैछ र नवनिर्वाचित राष्ट्रपति डोनाल्ड ट्रम्पले राष्ट्रपतिको शपथग्रहण गर्दै हुनुहुन्छ ।
एजेन्सी