• January 10, 2025

कांग्रेस–एमालेबीच भएको सहमति तलमाथि हुँदैन : सञ्चारमन्त्री गुरुङ

काठमाण्डौ । सरकारका प्रवक्ता एवम् सञ्चार तथा सूचना प्रविधि मन्त्री पृथ्वीसुब्बा गुरुङले संविधान संशोधनका विषयमा सत्तारूढ नेपाली कांग्रेस र नेकपा एमालेबीच भएको सहमति तलमाथि नहुने बताउनुभएको छ ।

सिंहदरबारमा पछिल्लो मन्त्रिपरिषद् बैठकको निर्णय आज सार्वजनिक गर्दै प्रवक्ता गुरुङले दुई दलबीच भएको ७ बुँदे सहमतिअनुसार नै संविधान संशोधनको प्रक्रिया अघि बढ्ने भन्दै सहमतिलाई असर पुग्ने कुनै काम नहुने बताउनुभएको हो । संविधान संशोधनका लागि पूरा गर्नुपर्ने प्रक्रिया लामो हुनसक्ने भएकाले केही समय लाग्नसक्ने सङ्केत प्रधानमन्त्री केपी शर्मा ओलीको पछिल्लो भनाइले अभिव्यक्त गरेको हुन सक्ने प्रवक्ता गुरुङको भनाइ छ ।

प्रवक्ता गुरुङले संविधान संशोधन गर्नुपर्ने कारणहरू पहिचान गरेर दुई दलले संशोधनको विषय किटान गर्ने र त्यसपछि यो विषयमा अरू दलहरूसँग छलफल हुने उल्लेख गर्नुभयो ।

गएको मङ्गलवार प्रधानमन्त्री ओलीले एमाले केन्द्रीय कमिटी बैठकमा संसद्को अहिलेको कार्यकालमा दुई तिहाइ नपुगे २०८७ सालमा संविधान संशोधन हुने बताउनुभएको थियो ।