• November 5, 2024

चीनले दियो प्रधानमन्त्री ओलीलाई भ्रमणको निम्तो

काठमाण्डौ।उत्तरीको छिमेकी देश चीनले प्रधानमन्त्री केपी शर्मा ओलीलाई भ्रमणको निम्तो पठाएको छ। चिनियाँ प्रधानमन्त्री ली छ्याङले प्रधानमन्त्री ओलीलाई सम्बोधन गरेर लेखेको पत्रमा आउँदो डिसेम्बर २ देखि ६ सम्म चीन भ्रमणको औपचारिक निम्तो दिनुभएको हो। एकसाता अघि नेपालस्थित चिनियाँ दूतावासका अधिकारीले परराष्ट्र मन्त्रालयमार्फत दिएको निम्तो प्रधानमन्त्री कार्यालय पुगेको स्रोतले जानकारी दियो।

संयुक्त राष्ट्रसंघको महासभामा सहभागी हुन अमेरिका जानुभएको बेला प्रधानमन्त्री ओली र चिनियाँ विदेशमन्त्री वाङ यीबीच असोज ११ गते न्यूयोर्कमा भेटवार्ता भएको थियो।

उक्त भेटमा वाङले नोभेम्बरको अन्तिम या डिसेम्बरको सुरूवातमा भ्रमण गर्ने गरी प्रधानमन्त्री ओलीलाई निम्ता गर्ने बताएका थिए। सोहीअनुसार नै चीनबाट निम्तो आएको र त्यसबारेमा छिट्टै निर्णय गर्ने बालुवाटार स्रोतले जानकारी दिएको छ। प्रधानमन्त्री ओली र भारतीय प्रधानमन्त्री नरेन्द्र मोदीबीच पनि अमेरिकामा भेट भएको थियो। त्यसबेला नेपालका तर्फबाट भारतीय प्रधानमन्त्री मोदीलाई नेपाल भ्रमणको निम्तो दिइएको थियो । भारतीय पक्ष भने प्रधानमन्त्री ओलीलाई बोलाउने विषयमा अहिलेसम्म मौन छ ।

नेकपा (एमाले)का अध्यक्ष ओली गत असार ३० गते प्रधानमन्त्री नियुक्त भएका थिए। प्रधानमन्त्री नियुक्त भएपछि ओली छिमेकी भारत र चीन भ्रमणमा जानु भएको छैन। प्रधानमन्त्री भएपछि ओलीलाई पहिलो पटक चीनले भ्रमणको औपचारिक निम्तो दिएको छ। प्रधानमन्त्री ओली चीन भ्रमणमा गएका खण्डमा त्यसबेला बिआरआइ परियोजनालगायत विषयमा पनि कुराकानी हुनेछ।