• July 9, 2024

विपदबाट भएको क्षतिबारे सदनलाई जानकारी गराउन कांग्रेसको माग

काठमाण्डौ । नेपाली कांग्रेसका प्रमुख सचेतक रमेश लेखकले विपदबाट देशका विभिन्न भागमा भएको जनधनको क्षतिबारे सदनलाई जानकारी गराउन सरकारसँग माग गर्नुभएको छ । प्रतिनिधिसभाको आजको बैठकमा आकस्मिक समयमा बोल्दै उहाँले देशभर बाढीपहिरो र डुबानबाट क्षति भएको र क्षतिकाबारेमा सञ्चारमाध्यममा आएका घटना सुनेर र पढेर सदनमा सुनाउनुपरेको उल्लेख गर्नुभयो ।

त्यस्तै माओवादी केन्द्रका सांसद महिन्द्रराय यादवले संविधान संशोधन गरेर देशलाई दुई दलिय प्रणालीमा लैजान खोजिएको बताउनुभएको छ । सांसद यादवले दुई ठूला दलले संविधान संशोधनमार्फत दुई दलिय प्रणालीमा लैजान खोजेको तर संघीयता, धर्मनिरपेक्षता, समानुपातिक र समावेशिता वर्तमान संविधानका चार पिल्लर रहेको भन्दै समानुपातिक र समावेशिता हटाउने कुरा सैह्य नहुने बताउनुभयो ।

उहाँले संविधान संशोधन गर्नुपर्ने अवस्थामा सर्वपक्षिय र सर्वदलिय आधारमा हुनुपर्नेमा जोड दिनुभयो । उहाँले वर्तमान सरकार संविधानको धारा ७६ (२) अनुसार बनेको उल्लेख गर्दै विस्वासको मत नपाएमा स्वतः धारा ७६ (३) अनुसार सरकार बन्ने बताउनुभयो ।