• June 18, 2024

ताप्लेजुङमा राहत, उद्वार र पुनर्निर्माणलाई उच्च प्राथमिकता दिन गृहमन्त्रीको ध्यानाकर्षण

काठमाण्डौ । उपप्रधान एवम् गृहमन्त्री रवि लामिछानेसमक्ष ताप्लेजुङबाट प्रतिनिधित्व गर्ने सांसदहरूले सो जिल्लाका विभिन्न स्थानमा हालै आएको बाढीपहिरोबाट भएको जनधनको क्षतिबारे ध्यानाकर्षण गराउनुभएको छ । बाढीपहिरोमा परि हालसम्म पाँचजनाको मृत्यु तथा ठुलो भौतिक क्षति भइसकेको छ ।

प्रतिनिधि सभाका सदस्यहरू योगेश भट्टराई, उर्मिला थेबे, लीलादेवी बोखिम (लिम्बू) ले मङ्गलबार उपप्रधानमन्त्रीसमक्ष जिल्लाका दर्जनौँ घरमा भएको क्षतिले सयौँको सङ्ख्यामा मानिस विस्थापित भएको तथा पक्की, झोलुङ्गे र काठे पुल तथा सडकमा भएको क्षतिले यातायातका साधन सञ्चालन हुन नसक्ने गरी विभिन्न स्थानमा आवतजावत तथा यातायातसमेत अवरुद्ध भएको अवगत गराउनुभएको हो ।

भेटमा गृहमन्त्री लामिछानेले ताप्लेजुङमा परेको विपत्तिबारेमा आफू जानकार रहेको र राहत, उद्वार र पुनर्निर्माणलाई उच्च प्राथमिकतामा राखी स्थानीय तह, प्रदेश सरकार, सङ्घका सरकारी कार्यालयसँगको समन्वय र सहकार्यमा सबै कार्य अघि बढाउने प्रविद्धता व्यक्त गर्नुभयो ।