• June 10, 2024

गण्डकीका मुख्यमन्त्री पाण्डेले आज विश्वासको मत लिने

गण्डकी प्रदेश सरकारका मुख्यमन्त्री सुरेन्द्रराज पाण्डेले आज (सोमबार) विश्वासको मत लिँदै हुनुहुन्छ । आज दिउँसो ३ बजे बस्ने प्रदेश सभा बैठकमा मुख्यमन्त्री पाण्डेले विश्वासको मत लिने कार्यसूची रहेको प्रदेश सभा सचिवालयले जनाएको छ ।

सर्वोच्च अदालतको परमादेशअनुसार गएको १६ गते मुख्यमन्त्रीमा नियुक्त हुनुभएका नेपाली कांग्रेस प्रदेश सभा संसदीय दलका नेता पाण्डेले संवैधानिक व्यवस्थाअनुसार विश्वासको मत लिन लाग्नुभएको हो ।

६० सदस्यीय गण्डकी प्रदेश सभामा मुख्यमन्त्रीले विश्वासको मत पाउन ३१ जना सांसदको समर्थन आवश्यक हुन्छ । प्रदेश सभामा सबभन्दा ठूलो दल कांग्रेसको २७ जना सांसद छन् । राप्रपाका २ सांसद तथा नेपाल समाजवादी पार्टीका फणिन्द्र देवकोटा र राजीव गुरुङ ‘दीपक मनाङे’ ले समर्थन गर्ने पाण्डेको विश्वास छ ।

पाण्डेलाई विश्वासको मत दिन कांग्रेस सभापति शेरबहादुर देउवाले राप्रपा अध्यक्ष राजेन्द्र लिङ्देनलाई पत्र लेख्नुभएको छ । तर राप्रपाले निर्णय गरिसकेको छैन । उहाँले विश्वासको मत नपाए संविधानको धारा १६८ को उपधारा ९५० अनुसार नयाँ सरकार गठनको बाटो खुला हुनेछ ।