• May 3, 2024

बाँकेमा बालबालिकालाई नियमित दिइने खोप डीपीटी र पोलियोको अभाव

काठमाण्डौ । बाँकेको बैजनाथ गाउँपालिमा एक वर्षभित्रका बालबालिकालाई नियमित दिइने डीपीटी खोप र पोलियोको अभाव भएको छ । बालबालिकालाई नियमितरुपमा लगाउने खोप डीपीटी र खुवाउने पोलियो अभाव भएको हो ।

गाउँपालिका स्वास्थ्य तथा सामाजिक विकास शाखाका सिनियर अहेब अधिकृत लक्ष्मण राज शाहीले बाँके जिल्ला कार्यालयले डीपीटी खोप र पोलियो उपलब्ध गराउन नसक्दा आफूले सेवाग्राहीलाई सेवा उपलब्ध गराउन नसकेको बताउनुभएको छ ।

जिल्ला कार्यालय बाँके र सङ्घको स्वास्थ्य सेवा विभाग अन्तर्गत पर्ने परिवार कल्याण महाशाखाले खोप अभाव नभएको दाबी गरेको छ । सरकारको नियमित खोप कार्यक्रम अनुसार डीपीटी खोप बच्चा जन्मेको ६ हप्ता, १० हप्ता र १४ हप्ता गरी ३ पटक लगाउनुपर्ने उल्लेख छ ।

साथै, पोलियो पनि दुई थोपा ३ पटक खुवाउनु पर्ने उल्लेख छ । बच्चा जन्मेको ६ हप्ता, १० हप्ता र १४ हप्तामा खुवाउनु पर्ने हुन्छ । डीपीटी भ्यागुते, लहरे खोकी, धनुष्टङ्कार र हेपाटाइसिस बी, वेक्टेरियल, मेनिन्जाइटिस विरुद्ध लगाइन्छ भने, पोलियोको थोपा पोलियो रोग विरुद्ध खुवाइने गरिन्छ ।