• November 29, 2023

नुवाकोटको बेलकोटगढी नगरपालिकाले ३ वटा एम्बुलेन्स सञ्चालनमा ल्यायो, पूर्ण अपाङ्गता भएका र सुत्केरीलाई निःशुल्क सेवा दिने

काठमाण्डौ । नुवाकोटको बेलकोटगढी नगरपालिकाले तीन वटा एम्बुलेन्स सञ्चालनमा ल्याएको छ ।

आफुले बाचा गरेअनुसार नगरपालिकाले हाल ३ वटा एम्बुलेन्स खरिद गरेको नगरप्रमुख जगतबहादुर गुरुङ बताउनु भएको छ । उक्त एम्बुलेन्स स्वास्थ्यचौकीलाई हस्तान्तरण गरि सञ्चालनमा ल्याइएको हो ।

नगरपालिकाका प्रमुख जगतबहादुर गुरुङले मङ्गलवार बेलकोटगढि नगरपालिका वडा नम्बर ३ को कुमारी स्वास्थ्य चौकी, बेलकोटगढी वडा नम्बर ६ दुई पिपल स्वास्थ्य चौकी र बेलकोटगढी वडा नम्बर ११ को बेलकोट स्वास्थ्य चौकीलाई एक एक वटा एम्बुलेन्स हस्तान्तरण गर्नुभएको हो ।

एम्बुलेन्स हस्तान्तरण गर्दै मेयर गुरुङले एम्बुलेन्सले स्वास्थ्य चौकीको सिफारिसमा पूर्ण अपाङ्गता कार्ड भएका बिरामी र सुत्केरी महिलालाई निःशुल्क सेवा उपलब्ध गराउने बताउनुभयो । उहाँले अहिले भूगोलका हिसाबले पाएक पर्ने गरी एम्बुलेन्स खरिद गरिए पनि यसलाई थप गर्दै लगिने बताउनुभयो ।

स्वास्थ्य सुविधा पाउनु जनताको नैर्सगिक अधिकार भएको बताउँदै उहाँले नगरपालिका नगरवासीहरूको यस अधिकारका लागि सधैँ तत्पर रहेको बताउनुभयो । एम्बुलेन्स हस्तान्तरण कार्यक्रममा प्रमुख प्रशासकीय अधिकृत, वडा अध्यक्ष कार्यपालिका सदस्य विभिन्न शाखा प्रमुख,कर्मचारी लगायतको सहभागिता थियो ।

नगरपालिकाले प्रति एम्बुलेन्स १८ लाख ७५ हजार ७ सय १८ अठार रुपैयाँमा एम्बुलेन्स खरिद गरेको हो । भन्सार महसुल, प्रज्ञापन पत्रशुल्कगरी कुल ५९ लाख ९८ हजार ५०० रुपैंयामा तीन बटा एम्बुलेन्स खरिद गरी सञ्चालनमा ल्याइएको हो ।