• October 18, 2023

महानगरपालिका भित्रका तीनवटा सडक खण्डहरु आजबाट एकतर्फी

काठमाण्डौ । काठमाण्डौ महानगरपालिकाले महानगरभित्र विभिन्न स्थानका सडकहरू आजदेखि एकतर्फी (वान वे) बनाएको छ ।

महानगरभित्र दोहोरो सवारी सञ्चालन भइरहेका तीनवटा सडक खण्डमा आजदेखि एकतर्फी सवारी सञ्चालन गर्ने व्यवस्था गरेको हो ।

काठमाण्डौ र ललितपुर जोड्ने सेतोपुल, गुसिङ्गाल, मिलनमार्ग हुँदै त्रिपुरेश्वर आउने सडकखण्ड एकतर्फी बनाइएको महानगरपालिकाका ट्राफिक विज्ञ सल्लाहकार जगतमान श्रेष्ठले जानकारी दिनुभयो ।

त्रिपुरेश्वरबाट ललितपुर जोड्ने सेतोपुल, गुसिङ्गाल, मिलनमार्ग सडकखण्डमा प्रवेश गर्न पाइँदैन । त्यस्तै त्रिचन्द्र क्याम्पसबाट गणेशस्थान, प्रज्ञा प्रतिष्ठान भवन हुँदै कमलादी आउने बाटो समेत एकतर्फी बनाइएको छ । अब जमलको बाटो हुँदै प्रज्ञा प्रतिष्ठान जान पाइने छैन ।

श्रेष्ठका अनुसार पुतलीसडकबाट काठमाडौं प्लाजा हुँदै हात्तीसारतर्फ सडकखण्डमा अब प्लाजाबाट बाँया मोड्न पाइने छैन । त्यहाँदेखि महेन्द्र शालिकसम्मको सडकलाई एकतर्फी बनाउने बनाइएको छ । यसबारे केही दिनसम्म सडक संकेत राखेर सर्वसाधरणलाई जानकारी गराइने बताइएको छ ।