• October 16, 2023

नेपाल प्रहरी हरेक पुस्ता र पिँढीका लागि प्रेरणाको स्रोत हुन् : गृहमन्त्री श्रेष्ठ

काठमाण्डौ । उपप्रधान एवम् गृहमन्त्री नारायणकाजी श्रेष्ठले देशको समृद्धि, समुन्नति र सुशासनका लागि आन्तरिक सुरक्षा व्यवस्था सुदृढ हुनुपर्ने बताउनुभएको छ । ६८ औँ प्रहरी दिवसका अवसरमा आज (सोमबार) प्रहरी प्रधान कार्यालयमा आयोजित कार्यक्रममा उहाँले नेपाल प्रहरीको भूमिका र कर्तव्यबोधले समग्र देशको समृद्धि, कानुनी शासन र सुशासनको पूर्ण अनुभूति गर्न सकिएको बताउनुभयो ।

गृहमन्त्री श्रेष्ठले चाडपर्वलगायत आफ्नो व्यक्तिगत र पारिवारिक दायित्वलाई थाती राखी देश र नागरिकको सुरक्षामा तैनाथ प्रहरी कर्मचारीको समर्पणभाव हरेक पुस्ता र पिँढीका लागि प्रेरणाको स्रोतका रूपमा रहने उल्लेख गर्नुभयो । उहाँले स्रोत साधनको अभावमा पनि राज्यले सुम्पेको जिम्मेवारीलाई नेपाल प्रहरीले निष्ठापूर्वक तथा प्रविधिसँग प्रभावकारी मिश्रण गरी छिटो, छरितो र गुणस्तरीय सेवा प्रवाह गर्दै आएको बताउनुभयो ।

नेपाल प्रहरीका प्रत्येक सदस्यले आमनागरिक र राज्यले सामना गरेको हरेक विषम परिस्थितिलाई निस्तेज तुल्याउन पेसागत कर्तव्यपरायणतामा उच्च मनोबलका साथ खटिँदै आएको जिकिर गर्नुभयो । नवीनतम आविष्कार र नयाँ प्रविधिका कारण बढ्दै गएका अपराधका नयाँ शैलीविरुद्ध तदारुकता बढाउँदै वर्तमान र भविष्यमा हुनसक्ने अपराधको रोकथाम तथा सफल अनुसन्धान गर्न सक्ने गरी नेपाल प्रहरी हरदम तयारी अवस्थामा रहनुपर्नेमा उहाँले जोड दिनुभयो ।

निष्पक्ष अनुसन्धानले पीडितलाई न्याय दिलाउनुका साथै राज्यमा दण्डहीनताको अन्त्य हुने बताउँदै गृहमन्त्रीले श्रेष्ठले प्रहरीको अनुसन्धानमा प्रश्न उठाउने आधार नभएको दाबी गर्नुभयो ।

उहाँले शहादत प्राप्त प्रहरी कर्मचारीको योगदानलाई स्मरण गर्दै उनीहरूप्रति श्रद्धासुमन अर्पण गर्नुका साथै घाइते भएका प्रहरी कर्मचारीको शीघ्र स्वास्थ्य लाभको कामना गर्नुभयो । नेपाल प्रहरीको निःस्वार्थ सेवा र अटल समर्पण भावलाई अँगाल्दै देश र नागरिक सुरक्षाका क्रममा शहादत प्राप्त प्रहरीका परिवारजनको पीडाका क्षणमा सरकार सधैँ साथमा रहने उहाँको भनाइ थियो ।

कार्यक्रममा गृहमन्त्री श्रेष्ठले प्रहरी प्रधान कार्यालयमा रहेको अमर प्रहरी स्मारकमा पुष्पहार अर्पण गर्नुका साथै कर्तव्य पालनाका क्रममा वीरगति प्राप्त गर्ने प्रहरीका परिवारलाई कदरपत्र प्रदान गर्नुभयो । उहाँले प्रहरी दिवस–२०८० स्मारिका र नेपाल प्रहरीलाई निःशुल्क जग्गा प्रदान गर्ने जग्गादाताको नामावलीका साथै प्रहरीसँग सम्बन्धित स्थापना भएका अक्षयकोषको विवरण पुस्तिकासमेत लोकार्पण गर्नुभएको थियो ।