• October 8, 2023

एमाले सुदूरपश्चिम प्रदेश अधिवेशन आजदेखि सुरु हुँदै, अध्यक्षमा तीन जना आकांक्षी

काठमाण्डौ । नेकपा एमालेको सुदूर पश्चिम प्रदेश अधिवेशन आजबाट सुरु हुँदै छ ।

धनगढी स्थित सौराइ ब्यांक्वाइटमा ११ बजेदेखि सुरु हुने अधिवेशनको उद्घाटन एमाले अध्यक्ष केपी शर्मा ओलीले गर्नुहुने छ । आज उद्घाटन सत्र सकिए लगत्तै बन्द सत्र सुरु हुने छ । अहिले सम्म प्रदेशको अध्यक्षमा नेताहरू कृष्णप्रसाद जैसी, कमल तिमिल्सिना र वचनबहादुर सिंहले दाबी गरेका छन् । अध्यक्ष बाहेकका अन्य सबै पदाधिकारी पदमा पनि आकाङ्क्षीहरू धेरै छन् ।

प्रदेश अधिवेशनका लागि पार्टीका महासचिव शङ्कर पोखरेल, पार्टीका सचिव तथा कर्णाली इन्चार्ज लेखराज भट्ट, सचिव तथा सुदूरपश्चिम प्रदेश इन्चार्ज छविलाल विश्वकर्मा, स्थायी कमिटी सदस्य तथा सङ्गठन विभाग प्रमुख काशीनाथ अधिकारी, स्थायी कमिटी सदस्य तथा खेलकुद विभाग प्रमुख कर्णबहादुर थापासहित केन्द्रीय सदस्यहरूको उपस्थित रहने एमालेले जनाएको छ ।

अधिवेशनमा प्रदेशका ९ जिल्लाका ६ सय ७५ प्रतिनिधि सहभागी हुनेछन् । अधिवेशनले पदाधिकारीसहित १ सय ५५ सदस्यीय नयाँ नेतृत्व चयन गर्ने छ ।