• September 26, 2023

गरिबलाई नभई गरिबी लखेट्न महानगरलाई एमाले अध्यक्ष ओलीको सुझाव

काठमाण्डौ । नेकपा (एमाले) का अध्यक्ष केपी शर्मा ओलीले फुटपाथ हिँड्नकै लागि भएपनि परम्परादेखि फुटपाथमा रोजिरोटीका लागि व्यापार गरिरहेका मानिसहरुको व्यवस्थापन कसरी गर्ने भन्ने मुख्य कुरा भएको बताउनुभएको छ ।

सामाजिक सञ्जाल फेसबुकमा उहाँले फुटपाथ (सडक) व्यापार हाम्रो परम्परागत नेवारी व्यापार संस्कृतिको अंश पनि हो भन्दै भन्नुभएको छ, “असन, इन्द्रचोक, भोटाहिटीतिर ५० औँ वर्ष अघिदेखि यस्तो चलेको हामीले देखेका थियौं । पुराना किताब, इतिहास र कथाहरूमा असन, इन्द्रचोकको व्यापारका विषयमा पढ्न पनि पाइन्छ ।”

अहिले परम्परागत रुपमा चल्दै आएको कुरालाइ एक्कासि परिवर्तन गर्न खोज्दा केही खल्बली हुनु स्वभाविक र वैज्ञानिक पनि हो भन्दै उहाँले महानगरबाट गरिबलाई नभई गरिबी लखेट्नु पर्ने बताउनुभयो ।

फुटपाथमा व्यापार गरिरहेकाहरुलाई उपमेयर सुनिता डंगोलले भेट्नु भएको भन्ने थाहा पाएको उल्लेख गर्दै अध्यक्ष ओलीले भन्नुभयो, “यो वार्ताबाट समाधान खोज्ने संकेत हुन सक्छ । दुवै युवा हुनुहुन्छ, छलफल गर्नुहोस्, समाधन निकाल्नुहोस् । समाधानको उपाय के हुन सक्छ, तपाईहरुको विचार पनि राख्नुस् है !”