• September 1, 2023

मानिस आवतजावतको लागि आजदेखि तातोपानी नाका खुल्दै

काठमाण्डौ । मानिस आवतजावतको लागि आजदेखि चीनसँगको तातोपानी नाका खुल्दै खुल्ने भएको छ ।

चिनियाँ अधिकारीहरुसँगको बैठकले सो नाका भएर मानव आवतजावत खुला गर्ने निर्णय गरेको तिब्बतस्थित नेपाली महावाणिज्य दूतावासले बताएको छ । आजदेखि सो नाका सञ्चालनमा ल्याउन समझदारी भएको महावाणिज्यदूत नवराज ढकालले जानकारी दिनुभयो ।

समझदारीमा नाकाबाट यात्रुहरुको आवतजावत खुला गर्ने भनिए पनि तत्कालका लागि भने स्थानीयका लागि मात्रै नाका खुल्ने छ । २०७२ सालको महाभूकम्प र त्यसपछिको कोरोना भाइरस महामारीका कारण तातोपानी नाका पूर्णरुपमा बन्द भएको थियो । तातोपानीको पारिपट्टीको चिनियाँ बजारसम्म पुग्नका लागि तातोपानीस्थित अध्यगमन कार्यालयले पास वितरण सुरु गरेको छ ।

अध्यागमनले जारी गरेको एकवर्षे अवधिको पास पाएकाहरुले आजदेखि चीनतर्फ प्रवेश पाउने कार्यालयले जनाएको छ । २०७२ सालको महाविनाशकारी भूकम्पपछि तातोपानी नाका पूर्ण रुपमा बन्द भएको थियो ।

दुवै देशले भूकम्पले क्षति पुगेको संरचना पुनर्निर्माण गरेपछि १४ जेठ २०७६ मा यो नाका वस्तु आयात निर्यातका लागि सञ्चालनमा आएको थियो । तर, कोरोनाभाइरस महामारी विश्वभर फैलिएपछि ११ चैत २०७६ मा नाका पुनः बन्द भएको थियो ।

कोभिड-१९ पछि नाका खुल्ने र बन्द हुने पटक-पटक भएपनि यात्रु आवतजावतका लागि नाका सञ्चालनमा आएको थिएन ।